काठमाडौं – दीपेन्द्र के खनालले घोषणा गरेको फिल्म ‘चिसो मान्छे’ आउँदो वर्षको भदौ ११ गते रिलिज हुने भएको छ ।

केही समयअघि निर्देशक खनालले सामाजिक सञ्जालमार्फत यो फिल्म निर्माणको घोषणा गरेका थिए । उनका अनुसार फिल्म घाममा खिचिने छैन ।

फिल्मलाई शर्मिला पाण्डेले निर्माण गर्नेछिन् भने निर्देशन खनालको रहनेछ । डिएस डिजिटल प्रालिको ब्यानरमा निर्माण हुने यो फिल्ममा कलाकारको छनोट अझै गरिएको छैन । फिल्ममा नेपालको सुदूरपश्चिम क्षेत्रको परिवेश समेटिने निर्देशक खनालले बताए ।

‘अहिलेको विषम परिस्थितिले सिर्जित अन्योल चाँडै अन्त्य हुनेछ भन्ने आशा र नेपाली चलचित्र क्षेत्रलाई पुनः चलायमान बनाउनुपर्छ भन्ने सोचका साथ हामीले निर्माण कार्य अगाडि बढाएका छौं,’ दीपेन्द्र के खनाल भन्छन् ।

यसअघि दीपेन्द्रको लेखन तथा निर्देशन रहेका फिल्म पशुपति प्रसाद, आमा लगायत फिल्मले चर्चा कमाएका थिए । ‘चिसो मान्छे’ को यतिबेला स्क्रिप्टमा काम भइरहेको छ । ‘यो लकडाउनको समयलाई फिल्मको स्क्रिप्ट लेखनमा सदुपयोग गरिरहेको छु, परिस्थिति सामान्य बन्नासाथ हामीले बाँकी काम थाल्छौं’ खनालले भने ।