एजेन्सी – इंग्ल्यान्डविरुद्धको अन्तिम तथा तेस्रो टेस्टमा पाकिस्तानले खराब सुरूवात गरेको छ ।

साउथह्याम्पटनको द रोज बलमा दोस्रो दिन शनिबार इंग्ल्यान्डले ५ सय ८३ रन जोड्दै इनिङ्स समाप्तिको घोषणा गरेसँगै ब्याटिङ थालेको पाकिस्तानले खराब सुरूवात गरेको हो ।

पहिलो इनिङ्स सुरू गरेको पाकिस्तानले दोस्रो दिनको खेल समाप्तिसम्म १०.५ ओभरमा २४ रन जोड्दा ३ विकेट गुमाएको छ । पाकिस्तान अझै ५५९ रनले पछि छ ।

यसअघि ब्याट्सम्यान ज्याक क्रोलीले दोहोरो शतक बनाउँदै इंग्ल्यान्डलाई उच्च स्कोरमा पुर्‍याए ।

पहिलो दिन शतक बनाएका क्रोलीले २ सय ६७ रनको दोहोरो शतकीय इनिङ्स खेले । टेस्टमा उनको यो पहिलो दोहोरो शतक हो ।

यस्तै जोस बट्लरले १ सय ५२ रनको शतकीय इनिङ्स खेले । त्यसबाहेक इंग्ल्यान्डका क्रिस वोक्सले ४० रन जोड्दा डम बेस २७ रनमा अविजित रहे । कप्तान जोय रुट २९ तथा डम सिब्ली २२ रनमा आउट भएका थिए ।

पाकिस्तानका यासिर शाह, शहिन अफ्रिदी र फावद आलमले २/२ विकेट लिए ।

दुई टिमबीचको यो खेल निर्णायक रहेको छ ।  तीन खेलको सिरिजमा इंग्ल्यान्ड १-० ले अघि रहेको छ । यसअघि दोस्रो टेष्ट बर्षाले प्रभावित भएपछि बराबरी भएको थियो ।