काठमाडौं । अमेरिकी सहयोग सम्बन्धी सम्झौता (एमसीसी) का बारेमा छलफल गर्न भन्दै नेकपा सचिवालय बैठक बस्न लागेको छ ।

अहिले केही बेरमा शुरु हुने सचिवालय बैठकमा नेकपा स्थायी समिति सदस्य समेत रहेका नेता भीम रावललाई समेत बैठकमा बोलाइएको छ । तीन बजेका लागि बोलाइएको बैठक बालुवाटारमा केही बेरमा शुरु हुने नेता रावलले जानकारी दिए ।

उनले भने,‘एमसीसीका बारेमा छलफल गर्न भन्दै मलाई वालुवाटार बोलाइएको थियो । म भर्खर आइपुगेको छु । सबै नेताहरु जम्मा भइसकेका छौं, प्रधानमन्त्री आइपुग्नुभएको छैन । ’

नेकपाका अनुसार एमसीसी, सरकारले जेठ १५ गते ल्याउने बजेटका बारेमा छलफल गर्न परराष्ट्रमन्त्री प्रदीप ज्ञवाली, अर्थमन्त्री डाक्टर युवराज खतिवडासहितका सचिवालयका नेताहरुलाई वालुवाटारमा बोलाइएको हो ।

नेकपाले एमसीसीका बारेमा अध्ययन गर्न गठन गरेको कार्यदलमा सदस्य रहेका मन्त्री ज्ञवाली र नेता रावललाई सचिवालय बैठकमै बोलाएर छलफल गर्न लागिएको हो ।