काठमाडौं – आज मातातीर्थ औंसी अर्थात् आमाको मुख हेर्ने दिन । नेपालीहरुले आजको दिन आमालाई विभिन्न कारणले सम्झिरहेका छन् । आजको दिन आमालाई सम्मान गर्दै सामाजिक सञ्जाल रंगिएका छन् ।

नायिका केकी अधिकारीले पनि आफ्नी आमालाई एक नोट लेखेर शेयर गरेकी छिन् । उनले सामाजिक सञ्जालमा एक नोट शेयर गर्दै लेखेकी छिन् – आमाको महिमा कसले पो शब्दमा लेख्न सक्ला ?

उनले नोटमा आमाको महिमा लेख्ने आँट नगरेको तर आमाको ममताले आफूहरु सधै कृतज्ञ भएको लेखेकी छिन् ।

‘२३ वर्षमा विवाह भएपछिको आफ्नो जिन्दगीको पूरा समर्पण हाम्रो परिवारलाई गरिदिनुलाई कति सजिलै लिन्छौं हामी,’ केकी लेख्छिन्, ‘म आमा हुँ अनि आमाको कुनै सपना हुँदैन भन्ने पंक्तिले मलाई साह्रै घोच्छ ।’

केकीले आमाको आँखामा कहिल्यै आँसु देख्न नपरोस् भनी कामना गरेकी छिन् । ‘हरेक जन्म हजुरकै कोखबाट होस् अनि त्यो कोखको साख राख्न सकूँ,’ केकी भन्छिन् ।