काठमाडौं– महानगरीय प्रहरी कार्यालय रानीपोखरीको सीआरभी टोलीका प्रहरी लुटपाट गर्ने क्रममा पक्राउ परेका छन् ।

काठमाडौंबाट लुटपाट गर्न मकवानपुर गएको अवस्थामा प्रहरीको सीआरभी टोली पक्राउ परेको हो ।

पक्राउ पर्नेमा महानगरीय प्रहरी बृत्त दरबारमार्गमा कार्यरत रही महानगरीय प्रहरीको सीआरभी टोलीमा संलग्न प्रहरी सहायक निरीक्षक (असई) सुरेन्द्रबहादुर  बसेल, प्रहरी जवानहरु हेमकान्त मगर र वीरबहादुर बस्नेत छन् । उनीहरुसँग एकजना पत्रकार पनि पक्राउ परेका जनाइएको छ । पक्राउ परेका पत्रकारको नाम सुजन आचार्य भनिए पनि उनी कुन सञ्चारमाध्यममा कार्यरत हुन भन्ने विषय भने खुलेको छैन ।

महानगरीय प्रहरी कार्यालय रानीपोखरीका प्रमुख प्रहरी नायव महानिरीक्षक (डीआईजी) विश्वराज पोखरेलले सीआरभी टोलीका सदस्यहरु लुटपाट गर्ने क्रममा पक्राउ परेको पुष्टि गरे ।

‘यहाँबाट मकवानपुर गएर लुटपाट गर्ने क्रममा पक्राउ परेको सूचना मैले पनि पाएको छु,’ डीआईजी पोखरेलले भने, ‘अपराधिक घटना रोक्ने जिम्मेवारी पाएकाबाटै अपराध भएको छ । यस्तो घटनामा संलग्नहरुलाई हदैसम्मको कारबाही हुन्छ ।’

डीआईजी पोखरेलका अनुसार मकवानपुर प्रहरीले पक्राउ परेका तीनै जनाविरुद्ध डाँका मुद्दामा अनुसन्धान शुरु गरिसकेको छ ।

महानगरीय प्रहरी कार्यालय रानी पोखरीले केही समय अगाडि मात्रै घुमुवा प्रहरीको टोली हटाएर विशेष प्रकारका अपरेशन र सूचना संकलनका लागि सीआरभी टोली खटाएको थियो ।