कञ्चनपुर – कञ्चनपुरको शुक्लाफाँटा नगरपालिका–४ असैनामा रहेको कुखुरा फार्ममा आगलागी हुँदा १० लाख रुपैयाँ भन्दा बढीको क्षति भएको छ ।

स्थानीयवासी किष्ना भण्डारीले सञ्चालन गरेको फार्ममा शनिबार विद्युत् सर्ट भएर आगलागी हुँदा बेच्ने तयारी अवस्थाका चार हजार कुखुरा र तीन हजार चल्ला जलेर नष्ट भएको हुन् ।

‘कमाइ खाने सहारा फार्म थियो’ भण्डारीले भने, ‘जलेपछि निकै ठूलो घाटा व्यहोर्नुपरेको छ, पुनः फार्म सञ्चालन गर्ने पूँजी छैन, परिवारको खर्च केले चलाउने भन्ने पिरलो छ ।’

आगो स्थानीय बासिन्दा, दमकल र प्रहरीको सहयोगमा नियन्त्रणमा  लिइएको थियो ।

भण्डारीले सात वर्षदेखि कुखुरा व्यवसाय गर्दै आएका थिए । नगरप्रमुख दिलबहादुर ऐर लगायतका जनप्रतिनिधिले फार्मको अनुगमन गरी क्षतिपूर्तिका लागि पहल गर्ने अश्वासन दिएका छन् ।