काठमाडौं– हिमालयन शेर्पालाई पराजित गर्दै थ्रीस्टार क्लब शहीद स्मारक ए डिभिजन लिगको शीर्ष तेस्रो स्थानमा उक्लिएको छ ।

बिहीबार त्रिपुरेश्वरस्थित दशरथ रंगशालामा भएको खेलमा शेर्पालाई ३–१ गोल अन्तरले पराजित गर्दै १४ अंकसहित थ्रीस्टार तेस्रो स्थानमा उक्लिएको हो । यसअघि थ्रीस्टार ७ खेलबाट ११ अंकसहित लिगको पाँचौ स्थानमा रहेको थियो ।

हिमालयन शेर्पालाई पराजित गर्न थ्रीस्टारका सुनिल राईले खेलको छैठौं मिनेटमा गोल गरे । खेलको पहिलो हाफको अतिरिक्त समयमा भने हिमालयन शेर्पाका स्टेफेन समिर देयुबेनीले गरे । देयुबेनीको गोलमा खेल १–१ बराबरी भएको थियो । तर, त्यसको १ मिनेट नवित्दै तत्काल थ्रीस्टारका लागि सञ्जोग राईले गोल पुन एक गोल थप्दै पहिलो हाफमा टीमलाई २–१ गोलको अग्रता दिलाएका थिए ।

सञ्जोगको उक्त गोल ए डिभिजन लिगको सयौं गोल हो । यस सिजनमा आठौं चरणको दोस्रो खेलमा आएर सय गोल पूरा भएको छ ।

२–१ गोलले अगाडि रहेको थ्रीस्टारका लागि ५० औं मिनेटमा ओसियु ओलान्दीरान हजमातले गोल गरेका थिए । उनले ५० औं मिनेटमा गरेको गोल नै थ्रीस्टारको जीतका लागि निर्णायक बन्यो ।

जीतसँगै थ्रीस्टार माथि उक्लिँदा शेर्पा भने ७ अंकसहित ११ औं स्थानमा छ ।