काठमाडौं – अमेरिकासँगको बढ्दो तनावका बीच चिनियाँ वायुसेनाले प्रशान्त महासागरको गुआम द्विपमा आक्रमण गरेको नक्कली भिडियो सार्वजनिक गरेको छ ।

उक्त भिडियोमा चिनियाँ सेनाले आफ्नो एच–६ परमाणु बमवर्षक विमानको प्रयोग गरेको देखाइएको छ । साथै भिडियोमा बमवर्षक विमानले बम खसाइरहेको देख्न सकिन्छ ।

अमेरिकाका एक शीर्ष अधिकारीको ताइवान यात्रालगत्तै यो भिडियो सार्वजनिक गरिएको थियो । उक्त भिडियो पिपुल्स लिबरेशन आर्मीको भिभो अकाउण्टमा शनिबार राखिएको थियो ।

चिनियाँ वायुसेनाको २ मिनेट १५ सेकेण्डको यो भिडियोमा चिनियाँ विमान कुनै मरुभूमिबाट उडेको देख्न सकिन्छ ।

पाइलटले एउटा बटन दबाउँछन् । उक्त बटन दबाएपछि एउटा मिसाइल समुद्र किनारको एक रनवेमा खस्छ । यो स्थान गुआकस्थित सैन्य अड्डाजस्तै देखिन्छ ।

यसलाई अधिकारीहरुले नक्कली भिडियो भएको बताएका छन् । कतिपयले भने चीनले शक्ति प्रदर्शन गरेको बताएका छन् ।