काठमाडौं – दर्शकलाई रंगशाला फर्काउने बेलायत सरकारको योजना स्थगित भएको छ । यसअघि अक्टोबर १ देखि दर्शकलाई रंगशाला प्रवेशका लागि खोल्ने तयारी गरिएको थियो ।

तर, नोबेल कोरोना भाइरस (कोभिड १९) को जोखिम नटरेपछि तत्कालका लागि बेलायत सरकारले त्यो निर्णय फिर्ता लिएको छ ।

बेलायतको मन्त्रीपरिषद्का सदस्य मिचेल गोभेले सरकारले उक्त निर्णय कार्यान्वन गर्न नसक्ने बताएका छन् । बेलाय सरकारले पाइलट कार्यक्रमका रुपमा यो योजनालाई अगाडि बढाइरहेको थियो ।

प्रधानमन्त्री बोरिस जोनसनको निर्देशन भएको भन्दै गोभेले बीबीसीसँगको कुराकानीमा बताएका छन् ।

यही महिनाको सुरुवातदेखि १ हजार जनालाई रंगशाला प्रवेश दिने बताइएको थियो । तर, त्यसमा पनि बन्देज लगाइएको छ ।

‘हामी धेरै मानिसहरुलाई रंगशाला फर्काउने योजना बनाइरहेका छौं । अहिलेका लागि यो रोकिएको छ। तर, कसरी यसलाई अगाडि बढाउन सकिन्छ हामी तयारी गरिरहेका छौं,’ मन्त्री गोभेले भने ।

बेलायतमा कोरोना भाइरसको जोखिम देखिएदेखि अधिकांश खेलकुद गतिविधि क्लोज डोरमा भइरहेका छन् ।

प्रिमियर लिग, एफ ए कप फाइनल, इङ्ग्ल्यान्डको टेस्ट क्रिकेट र दुई फर्मुला ए रेसहरु दर्शकविनै भएका प्रतियोगिता हुन् । मार्चदेखि बेलायतमा खेलकुद गतिविधि बन्द भएको थियो । तर, पछि जुलाइबाट बन्द रंगशालामा खेल फर्किएको थियो ।