काठमाडौँ – साउदीले यो वर्षको हज यात्रा रोकेको छ ।

कोरोना भाइरसको महामारीका कारण हज यात्रा रोकिएको हो । योसँगै नेपालका मुस्लिम धर्मावलम्वीहरूबाट उठाइएको हज यात्रा शुल्क हज समितिले फिर्ता गर्न थालेको छ ।

विश्वभर फैलिएको कोरोना भाइरस संक्रमणका कारण साउदी अरबको हज तथा उम्राह मन्त्रालयले केही दिनअघि यो वर्षको हज नहुने घोषणा गरेपछि समितिले संकलित रकम फिर्ता दिन थालेको हो ।

यो वर्ष हजमा जानका लागि करिब १५ सय नेपाली मुसलमानले समितिमा रकम जम्मा गरेका थिए ।

पहिलो चरणमा एक जना हज यात्रीसँग एक लाख २५ हजार रुपैयाँका दरले रकम संकलन गरिएको थियो । हज नहुने भएपछि उक्त रकम फिर्ता गर्न थालिएको हो ।

हिजरी सम्वत्‌को जिल्हिज्जा महिनामा विश्वभरका लाखौं मुसलमानहरु हजका लागि साउदी अरबको मक्का र मदिना जाने गर्छन् । हज इस्लामका ५ आधार स्तम्भमध्येको एक मानिन्छ ।