हतुवागढी– भोजपुर जिल्लाको हतुवागढी गाउँपालिकामा कोरोना भाइरसको र्‍यापिड डाइग्नोस्टिक टेस्ट (आरडीटी)मा पोजेटिभ देखिएका युवकको सम्पर्कमा रहेका परिवारका सदस्यको रिपोर्ट नेगेटिभ आएको छ ।

उनका बुवा, भाइ र अन्य तीन साथीको बुधबार आरडीटी गर्दा सबैको रिपोर्ट नेगेटिभ आएको स्वास्थ्य कार्यालयका प्रमुख फणीन्द्र थापाले जानकारी दिए ।

गत फागुन ३० गते साउदी अरबबाट काठमाडौंं आएका ती युवक चैत ११ गते हतुवागढी आइपुगेका थिए । होम क्वारेन्टाइनमा रहेका उनको रिपोर्ट पोजेटिभ देखिएपछि प्राथमिक स्वास्थ्य केन्द्र घोरेटारमा रहेको आइसोलेशनमा राखिएको स्वास्थ्य कार्यालयले जनाएको छ ।

ती युवकको स्वाब संकलन गरी कोरोना पुष्टिका लागि बिपी कोइराला स्वास्थ्य विज्ञान प्रतिष्ठान धरान पठाइएको बताइएको छ ।