राजविराज– ज्यान मार्ने उद्योग (प्रयास) गरेको आरोपमा पक्राउ परेका व्यक्तिको र्‍यापिड परीक्षण गर्दा कोरोना संक्रमणको संकेत (एन्टिबडी) पोजेटिभ देखिएपछि उनलाई थुनामा नराखी आइसोलेसन वार्डमा भर्ना गरिएको छ ।

सप्तरीको डाक्नेश्वरी नगरपालिका–४ भुतहीका सोगवीर रामको कान काटेको अभियोगमा पक्राउ परेका आरोपितको र्‍यापिड टेस्ट (आरडीटी) गर्ने क्रममा कोरोना संक्रमणको संकेत देखिएको हो ।

आरडीटीका क्रममा एन्टिबडी पोजेटिभ देखिएपछि उनलाई थुनामा नराखी राजविराजस्थित गजेन्द्रनारायण सिंह अस्पतालको आइसोलेसनमा राखिएको अस्पतालका प्रमुख मेडिकल सुपरिटेन्डेन्ट डा चुमनलाल दासले बताए । आरोपित घाइते सोगवीरका भिनाजु हुन् ।

सप्तरीको चनही मल्हनिया घर भई ससुरालीमा घरज्वाइँ बस्दै आएका आरोपित र उनका साला सोगवीरबीच जमिनको विषयमा विवाद रहेको छ । कदमको रुख काट्ने विषयमा सोमबार विवाद हुँदा धारिलो हतियारले सालाको कान छिनिएको हो । आरोपितले घाँटी ताकेर प्रहार गरेको खुकरी छल्दा कान काटिएको घाइतेले बताए ।

छिनिएको कान लिएर उपचारका लागि घाइते बिपी कोइराला स्वास्थ्य विज्ञान प्रतिष्ठान धरान पुगेको घाइतेका दाजु रघुवीर रामले बताए ।

अस्पतालका प्रमुख मेडिकल सुपरिटेन्डेन्ट डा दासले आरडीटी पोजेटिभ देखिएका आरोपित ४८ वर्षीय पुरुषको स्वाब परीक्षणका लागि बुधबार धरानस्थित बिपी कोइराला स्वास्थ्य विज्ञान प्रतिष्ठान पठाइने बताए ।