काठमाडौं – अभिनेता राजेश हमालले सबैलाई सावधानी अपनाउन आह्वान गरेका छन् । कोरोना भाइरसको संक्रमणबाट बच्न एकमात्र विकल्प भनेको सावधानी अपनाउनु भएको भन्दै सबैलाई सचेत हुन आग्रह गरेका हुन् ।

कोरोना भाइरसका कारण नेपालीको जनजीवन प्रभावित बनेको छ । नेपालमा अझैसम्म कसैको पनि कोरोना भाइरसका कारण ज्यान गएको छैन ।

अभिनेता हमालले सामाजिक सञ्जालमार्फत सबैलाई सचेत रहन र वातावरणको संरक्षण गर्नुपर्नेमा पनि जोड दिएका छन् ।

‘म आफैले पनि आफ्नो दैनिकीमा परिवर्तन ल्याएको छ, घरमै बसिरहेको छु, धेरै भीड हुने कार्यक्रममा गइरहेको छैन,’ हमाल भन्छन् ।

यसअघि पनि भाइरलका कारण कैयन् नेपालीले ज्यान गुमाएको तर यस्तो डरलाग्दो अवस्था नआएको हमाल बताउँछन् । भन्छन्, ‘धेरै भेला हुने सबै कार्यक्रम रद्द गरेर घरमा बसिरहेको छु । हामी सबैले यही नै गर्नुपर्छ ।’

हमालले स्वास्थ्य र प्रकृतिलाई बिथोल्ने नहुने भन्दै प्रकृतिको जगेर्ना गर्नुपरे बताएका छन् । साथै उनले आफ्ना फ्यानहरुलाई सरसफाइमा ध्यान दिन र राम्रोसँग साबुन पानीले हात धुन अनुरोध गरेका छन् ।

‘अन्य व्यक्तिलाई छुने, अंकमान गर्ने नगर्नुहोला, हाम्रो नमस्कार गर्ने संस्कार नै ठीक छ,’ हमाल भन्छन् ।

‘नमस्कार गर्ने हाम्रै चलन असाध्यै राम्रो थियो । हामीले बिर्सिदै गएका थियौं, कोरोनापछि हाम्रो आफ्नै संस्कार छ, त्यही चलन बसालौं ।,’ हमालको आग्रह छ ।

राजेश हमालले फिल्म नखेले पनि उनी व्यस्त रहन्छन् । कोरोनाका कारण हमाल फुर्सदमा छन् । फुर्सदको समयमा हमाल सामाजिक सञ्जालमा सक्रिय छन् ।