काठमाडौं– सत्तारुढ दल नेपाल कम्युनिस्ट पार्टी (नेकपा) सचिवालयको बैठक बस्ने भएको छ ।

सेक्युरिटी प्रिन्टिङ प्रेस र एमसीसीबारे छलफल गर्न सचिवालय बैठक बस्न लागेको हो ।

नेकपाका अध्यक्ष पुष्पकमल दाहाल प्रचण्डले चितवनमा आयोजित एक कार्यक्रममा एमसीसी र भ्रष्टाचार नियन्त्रणका सवालमा पार्टीभित्र गम्भीर छलफल हुने बताएका थिए ।

बैठक मुख्यगरी सेक्युरिटी प्रेस खरिद प्रकरणमा तत्कालिन सञ्चारमन्त्री गोकुल बाँस्कोटाले ७० करोड कमिसन माग गरेको अडियो प्रकरणपछि उत्पन्न परिस्थिति र शुक्रवार एमसीसी अध्ययन कार्यदलले बुझाएको प्रतिवेदनको विषयमा छलफल हुने छ ।

पार्टी अध्यक्ष प्रचण्ड चितवनबाट राजधानी फर्किए लगत्तै बैठक बस्ने छ । बैठकमा नयाँ सञ्चारमन्त्री र सहरी विकास मन्त्री चयनका विषयमा पनि छलफल हुने सम्भावना रहेको बालुवाटार निकट श्रोतको भनाइ छ ।