काठमाडौं – माघ २४ गतेदेखि प्रदर्शनमा आउने फिल्म ‘सेल्फी किङ’ मा विपिन कार्कीको शीर्ष भूमिका छ । निर्माण टिमले फिल्मको टिजर, गीत तथा ट्रेलर सार्वजनिक गरिसकेको छ ।

फिल्मको फस्ट लूक सार्वजनिकपछि नै चर्चामा रहेको यो फिल्मलाई एक हास्यकलाकारको जीवनमा आइपरेको उतारचढावको कथा भनिएको छ ।

फिल्मका निर्माता दिनेश राउतले भने यो फिल्म एक कलाकारको जीवनमा आइपर्ने कथा मात्रै नभएर बाबु–छोराको सम्बन्धको कथामा आधारित फिल्म भएको खुलाएका छन् ।

खबरहबसँगको कुराकानीमा राउतले भने, ‘हामीले अहिलेसम्म बाहिर नल्याएको कुरा के हो भने यो फिल्मको मुख्य कथा बाबुछोराको सम्बन्धमा आधारित छ ।’

निर्देशक विशाल सापकोटाका अनुसार फिल्मको कथा एक वास्तविक कलाकारको जीवनमा आधारित छ । तर, कसको कथा हो भन्ने खुलाउँदा फिल्मको मुख्य प्लट नै आउट हुने डरले उक्त कुरा निर्माण टिमले बाहिर ल्याएको छैन ।

निर्माता राउतले भावनात्मक रुपमा फिल्मले दर्शकलाई बाँध्ने बताए । उनले भने, ‘यो फिल्मको कथा सुनेपछि नै म आफैले लगानी गर्न तयार भएँ, निर्देशकले कथा सुनाउँदा नै फिल्म मन परेको हो ।’

‘सेल्फी किङ’ मा विपिन कार्कीले शीर्ष भूमिका निभाएका छन् । फिल्ममा लेखन तथा निर्देशन विशाल सापकोटाको छ । यस्तै फिल्ममा लक्ष्मी बर्देवा, अभय बराल, कमलमणि नेपाल, भुवन चन्द, लोकमणि सापकोटा, जीवन भट्टराई लगायतका कलाकारको अभिनय छ ।