वीरगञ्ज- संयुक्त अरब इमिरेट्स (यूएई)मा जारी इन्डियन प्रिमियर लिग (आईपीएल)का खेलमा सट्टेबाजी गरेको आरोपमा प्रहरीले बाराको कलैयाबाट तीन जनालाई पक्राउ गरेको छ ।

कलैया उपमहानगरपालिका–१ राजदेवी टोल बस्ने २५ बर्षका राजुकुमार यादव, २७ बर्षका दीपककुमार सरार्फ र मोतिबाग टोल बस्ने २९ बर्षका रवि दासलाई प्रहरीले पक्राउ गरेको हो ।

उनीहरुको साथबाट सट्टेबाजीका लागि प्रयोग गरेको बिभिन्न बैंकको चेक, नगद १ लाख ७७ हजार ५० रुपैयाँ र मोबाइल २ थान समेत बरामद गरेको जिल्ला प्रहरी कार्यालय बाराका प्रवक्ता प्रहरी नायब उपरीक्षक (डीएसपी) गौतम मिश्रले जानकारी दिए ।

उनीहरु विरुद्ध सट्टाबाजी मुद्दा अन्तर्गत बारा जिल्ला अदालतबाट म्याद अनुमति लिई हिरासतमा राखी थप अनुसन्धान जारी रहेको प्रहरीले जनाएको छ ।