मोरङ- मोरङको ग्रामथान गाउँपालिका – ४ मा पोखरीमा डुबेर आमासहित दुई छोरीको मृत्यु भएको छ ।

ग्रामथान – ४ बनसखण्डीका बस्दै आएकी ३५ वर्षीया सीता अधिकारी, उनकी १३ वर्षीया छोरी पवित्रा र ९ वर्षीया छोरी कृतिकाको मृत्यु भएको प्रहरीले जनाएको छ ।

इलाका प्रहरी कार्यालय बेलबारीका प्रहरी निरिक्षक ऋषिराज ढकालका अनुसार आइतबार दिउँसो माछा पाल्ने पोखरीमा सीताका दुई छोरी पसेका थिए ।

पोखरीमा दुई छोरी डुबेपछि उद्दारमा गएकी सीताको पनि मृत्यु भएको ढकालले बताए ।

प्रहरीका अनुसार सीताका श्रीमान नौं वर्षयता सम्पर्क बिहीन छन् । कान्छी छोरी दुई महिनाकी हुँदा श्रीमान बेपत्ता भएपछि सीता दुई छोरीसहित माइतमा बस्दै आएकी थिइन् ।

माइतमा घर नजिकै खेतमा माछा पाल्नका लागि पोखरी बनाइएको थियो । दिउँसो पोखरीमा डुबे पनि प्रहरीलाई खबर भने साँझ ६ बजेतिर मात्र पुगेको थियो ।