काठमाडौं- शिव सेना नेपालले नेपालको राष्ट्रिय झण्डा जलाउने र रौतहटमा पुजारीको हत्या गर्ने यी दुबै घटनामा संलग्नलाई कडाभन्दा कडा कारबाही गर्न माग गरेको छ ।

बिहीबार शिव सेना नेपालका अध्यक्ष अनिल बस्नेत ‘बाबा’ले विज्ञप्ति जारी गर्दै यी दुबै घटनामा संलग्नलाई कडा कारबाहीको माग गरेका हुन् ।

उनले देशको झण्डा जलाउनेहरु जो सुकै जहाँ भेटिन्छन्, त्यही कारबाही गरिने चेतावनी समेत दिएका छन् । अध्यक्ष बस्नेतले देशको झण्डा जलाउने कार्य अपराधको पराकाष्ठा भएको उल्लेख गरेका छन् ।

विज्ञप्तिमा भनिएको छ,‘यस्ता अपराधीलाई यो देशमा बस्ने अधिकार छैन । यस्ता देशद्रोहीहरुलाई जहाँ भेटिन्छ, त्यही कारबाही गरिनेछ ।’

राष्ट्रिय झण्डा जलाएर म्युजिक भिडियो बनाउने कार्यमा संलग्न भएको आरोपमा ९ जनालाई प्रहरीले पक्राउ गरिसकेको छ ।

यता बुधबार राति रौतहटको माधवनारायण नगरपालिका –२ स्थित हनुमान मन्दिरका पुजारी राम साहलाई गोली हानी हत्या गरिएको घटनालाई शिव सेनाले गम्भीर रुपमा लिएको छ ।

अध्यक्ष बस्नेतले बारम्बार हिन्दू साधुहरुमाथि भइरहेका आक्रमणका घटनाहरुलाई लिएर सुनियोजित रुपमा समेत भएको हुनसक्ने आशंका गरेका छन् ।

उनले पुजारी हत्या घटनासको सत्यतथ्य छानविन गर्न समेत माग गरेका छन् ।