काठमाडौं – राष्ट्रिय खेलकुद परिषद् (राखेप) का निवर्तमान सदस्य सचिव तथा अहिले सदस्य सचिवका मुख्य दाबेदारका रुपमा रहेका रमेशकुमार सिलवालविरुद्ध उजुरी परेको छ ।

उनीविरुद्ध युवा तथा खेलकुद मन्त्रालयमा उजुरी परेको हो ।

नेपाल उशु संघका उपाध्यक्ष तथा खेलकुद महासंघका उपाध्यक्ष रहेका जनक बढ्तौलाले सिलवालले काठमाडौं, पोखरा र जनकपुरमा भएको १३ औं दक्षिण एसियाली खेलकुद (साग) मा अनियमितता गरेको भन्दै मन्त्रीको कार्यालयमा उजुरी दिएका हुन् ।

उनले उजुरीमा लेखेका छन्, ‘साग आयोजना गर्दा भ्रष्टाचार गरेको आरोप लाग्दै अख्तियारमा उजुरी परेको व्यक्ति राखेपमा आउनु हुँदैन ।

खेलकुद जस्तो पवित्र संस्थामा यस्तो व्यक्ति पुन: आउँदा खेलाडी, खेल संस्था कसैलाइ पनि राम्रो नहुने र भ्रष्टाचार अझ मौलाउने भएकाले सिलवाल आउनु हुँदैन ।’

राखेप सदस्य सचिवका लागि ३ जना महिलासहित २७ जनाले आवेदन दिएका छन् । जसमा नेकपाका केन्द्रीय सदस्य लिलबहादुर थापा मगर, महासंघका केन्द्रीय सदस्य मेघराज पौडेलदेखि निवर्तमान सदस्य सचिव सिलवालले आवेदन दिएका छन् ।