तनहुँ – आइतबारदेखिको अविरल वर्षापछिको पहिरोले पृथ्वीराजमार्गअन्तर्गत तनहुँ खण्ड पनि आज बिहानदेखि अवरुद्ध भएको छ ।

तनहुँको म्याग्दे गाउँपालिका–१ गुणादी र आँबुखैरेनी गाउँपालिका–२ स्थित ऐनापहरामा पहिराका कारण राजमार्ग अवरुद्ध भएको हो ।

जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सिनाले दुई ठाउँमा गएको पहिरोका कारण बिहानैदेखि राजमार्ग अवरुद्ध रहेको जानकारी दिए ।

पहिरो हटाएर राजमार्ग सञ्चालनको प्रयत्न भइरहेको र केही समय लाग्ने प्रनाउ तिमिल्सिनाले बताए ।

‘दुई ठाउँमा पहिरो गएका कारण राजमार्ग सञ्चालन गर्न केही समय लाग्छ’, उनले भने, ‘करिब ४०/४५ मिनेटसम्ममा राजमार्ग सञ्चालन हुन्छ ।’

राजमार्ग अवरुद्ध हुँदा पोखरा र मुग्लिङतर्फबाट आउँदै गरेका सवारी साधन रोकिएका छन् ।  पृथ्वी राजमार्गकै धादिङ र चितवनका विभिन्न स्थानमा पहिरो जाँदा सोमबारदेखि सो क्षेत्रमा सडक अवरूद्ध भएको छ ।