हुम्ला-कोरोना भाइरस (कोभिड–१९) को संक्रमणको जोखिमबाट जोगिन हुम्लाको नाम्खा गाउँपालिकाले लकडाउन उल्लंघन गरी सीमा क्षेत्रमा आवतजावत गर्नेलाई २५ हजार रुपैयाँ जरिवाना तिराउने निर्णय गरेको छ ।

जनप्रतिनिधिको संयुक्त बैठकले सीमाबाट आवतजावत गरेको पाइए २५ हजार रुपैयाँ जरिवानासहित सम्बन्धित व्यक्तिकै खर्चमा १४ दिनसम्म क्वारेन्टाइनमा राख्ने निर्णय गरेको हो ।

गाउँबाट आधा घण्टामा पुग्न सकिने मैदानमा क्वारेन्टाइनको निर्माण गरिएको छ । बाहिरबाट आएकाहरुलाई १४ दिनसम्म अनिवार्य क्वारेन्टाइनमा बस्नु पर्ने, उल्लंघन गरेर घरमा गएको खण्डमा पूरै परिवार क्वारेन्टाइनमा बस्नु पर्ने नियम बनाइएको छ ।

गाउँपालिकाले पुलमा काँडाकाे बार लगाएर अन्य व्यक्तिहरुको प्रवेशमा समेत निषेध गरेको छ ।  स्थानीयले टुक्सोखोल्मु पुलमा काँडाको बार लगाएर आवतजावतमा रोक लगाएका हुन् ।

गाउँमा अन्य गाउँबाट आउने कोही पनि छिर्न नपाउन् भनेर स्थानीयले यस्तो उपाय निकालेको नाम्खा गाउँपालिकाका अध्यक्ष विष्णु बहादुर तामाङ (लामा)ले बताए ।

उनीहरुले  गाउँका बासिन्दाबाहेक अन्य अपरिचित व्यक्तिलाई गाउँमा छिर्न नदिन गाउँ प्रवेश गर्ने मुख्य पुल नै बन्द गरेका हुन् ।

पुलमा बार लगाउनुका साथै कोही नयाँ व्यक्तिहरु लुकीछिपी प्रवेश गर्लान् कि भनेर पालो मिलाएर पुलमा निगरानी समेत गर्ने गरिएको छ ।

यसैगरी नाम्खा गाउँपालिकाको वडा नं. ३ को केर्मी गाउँका बासिन्दाले पनि लकडाउन उल्लंघन गरेमा १० हजार जरिवाना तोकेका छन् ।