जनकपुरधाम– कोरोना भाइरस (कोभिड १९) को जोखिम आउन नदिन जनकपुरधाममा धार्मिक अनुष्ठान शुरु गरिएको छ । जनकपुरधामको राममन्दिरमा महामृत्युञ्जय जाप शुरु गरिएको राममन्दिरका महन्थ राम गिरीले जानकारी गराए ।

हिन्दूको धार्मिकग्रन्थ शिवपुराण र अन्य धार्मिक ग्रन्थमा पनि ग्रहदशाका साथै रोगबाट मुक्तिका लागि नियम निष्ठापूर्वक महामृत्युञ्जय मन्त्रको जाप गरेको अवस्थामा मानव विभिन्न समस्याबाट मुक्त हुने उल्लेख गरिएको छ ।

सो भाइरसको जोखिम बच्न धार्मिकस्तरबाट महामृत्युञ्जय जाप आयोजन गरिएको राममन्दिरका महन्थ गिरी भन्छन्, ‘अराध्यदेव महादेवको आराधना गरी कोरोना भाइरसबाट जीवन र मृत्युबीच सङ्घर्षरत रहेका व्यक्तिहरु तत्काल निको होस् भनि जापको माध्यमबाट कामना गरिएको हो ।’ ६ जना पण्डितबाट सो मन्त्रको जप पाँच दिनमा सम्पन्न हुनेछ ।