काठमाडौं– कोरोना भाइरस (कोभिड–१९) संक्रमणको सन्त्रासका कारण अकुपेन्सी दर घट्दै गएपछि काठमाडौंका तारे होटेलहरु बन्द हुन थालेका छन् ।

होटल हायातले केही दिन अगाडि नै सूचना प्रकाशित गर्दै केही समयका लागि सेवा बन्द गर्ने घोषणा गरिसकेको थियो ।

काठमाडौंको दरबारमार्गस्थित होटल याक एण्ड यतीले पनि सूचना टाँस गरेर अनिश्चित कालका लागि सेवा बन्द गरेको जनाएको छ ।

होटलले कर्मचारी तथा कामदारहरुलाई सेवा बन्द भएको अवधिभर २५ प्रतिशत सुविधा दिने गरी बिदा गरिसकेको छ ।

कोरोना भाइरस संक्रमणको सन्त्रासका बीच पछिल्लो समय होटलको अकुपेन्सी घट्दै गएको छ ।

होटल व्यवसायी संघ (हान)का अनुसार तारे होटलहरुको अकुपेन्सी दर १० प्रतिशतभन्दा पनि तल झरेको छ ।

पछिल्लो समय गेस्टहरु आउन कम भएपछि काठमाडौंका अन्य तारे होटलहरुले पनि कर्मचारीहरुलाई बिदामा पठाउन थालिसकेका छन् ।