काठमाडौं– नेपाल सरकारको अनुमति विना विभिन्न देशबाट स्वदेश फर्किएका ६३ नेपालीलाई शनिबार १४ दिनका लागि क्वारेन्टाइनमा पुर्‍याइएको छ ।

अध्यागमन विभागका अनुसार सरकारले प्रतिबन्ध लगाउँदा लगाउँदै विभिन्न देशबाट ६३ जना नेपालीहरु स्वदेश फर्किएका थिए ।

विश्वव्यापी महामारी बनेको कोरोना भाइरस (कोभिड–१९) संक्रमणको जोखिम कम गर्न सरकारले युरोपका सबै मुलुक, पश्चिम एसिया, खाडीका मुलुक, इरान, टर्की, दक्षिण कोरिया र जापानबाट आउने स्वदेशी तथा विदेशीहरुलाई प्रवेशमा प्रतिबन्ध लगाएको थियो ।

तर, विभिन्न विमान कम्पनीहरुले नेपाल सरकारले लगाएको प्रतिबन्धको वेवास्ता गर्दै ५ महिलासहित ६३ नेपालीलाई काठमाडौं पुर्‍याएका थिए ।

उनीहरुलाई शनिबार साझा यातायातका २ वटा बसमा राखेर भक्तपुरको खरिपाटीस्थित क्वारेन्टाइनमा पुर्‍याइएको त्रिभुवन अन्तर्राष्ट्रिय विमानस्थल अध्यागमन कार्यालय स्रोतले जानकारी दिएको छ ।