जलेश्वर– आज भगवान् शिवको पूजा–आराधना गरी शिवालयहरुमा महाशिवरात्रि पर्व मनाइँदै छ ।

विहानैदेखि देशका विभिन्न शिवालयमा दर्शनार्थीको भिड लागेको छ । यस्तै, महोत्तरीको जलेश्वरस्थ्ति जलेश्वरनाथ मन्दिरमा पनि विहानैदेखि पूजा तथा दर्शनका लागि आउने भक्तजनको घुँइचो छ ।

नेपाली सेना, नेपाल प्रहरी, सशस्त्र प्रहरीसहित स्थानीय व्यक्तिले मन्दिर भित्रको जल निकालेर दर्शन गर्न सहज बनाएका छन् ।

शिवलिङ्ग समेत छोपिने गरी जलेश्रनाथ मन्दिरको गुफामा जल भरिएको हुन्छ । जल बाहिर निकाल्न कुनै पनि मेसिनरी सामग्री प्रयोग गर्न मिल्दैन ।

मन्दिरमा दर्शनका लागि शुक्रबार बिहान १ बजेदेखि सर्वसाधरणको प्रवेश खुला गरिएको थियो ।

जलेश्वरनाथ महादेवको दर्शन गर्न सर्वसाधारणसँगै विभिन्न राजनीतिक दलका प्रादेशिक तथा केन्द्रीय नेताहरु पनि पुगेका छन् ।
राष्ट्रिय जनता पार्टी (राजपा)को अध्यक्ष मण्डलका सदस्य राजेन्द्र महतोसहित सांसद सरिता साह पनि मन्दिर पुगे ।

प्रदेश सरकारका मन्त्री आभिराम शर्मा तथा प्रमुख जिल्ला अधिकारी तथा जलेश्वर नगरपालिकाका प्रमुख शंकर मिश्र लगायतले मन्दिरमा पूजा–आजा गरे ।

तस्वीरहरु– शुभम साह