काठमाडौं – आज शुक्रवारदेखि नेपालमा फिल्म हलमा धुर्मुस सुन्तलीको ‘सेन्टीभाइरस’ र सुरक्षा पन्तको ‘आमा’ प्रदर्शनमा आएका छन् ।

रिलिजअघि दुवै फिल्मले राम्रो चर्चा कमाएका थिए । सिङ्गल थिएटरमा धुर्मुस सुन्तलीको ‘सेन्टीभाइरस’ ले ओपनिङ दर्शक पाएको छ ।

मल्टिप्लेक्समा भने दुवै फिल्मले बराबरजस्तै शो पाएका छन् ।

रामबाबु गुरुङले निर्देशन गरेको फिल्म ‘सेन्टीभाइरस’ मा सीताराम कट्टेल, कुञ्जना घिमिरे, विल्सन विक्रम राई, सन्दीप क्षेत्री, राजाराम पौडेल, बुद्धि तामाङ लगायतका कलाकारको शीर्ष भूमिका रहेको छ ।

यो फिल्मलाई कमेडी जानरामा निर्माण गरिएको छ । फिल्मको ५० प्रतिशत कमाइ चितवनमा निर्माण भइरहेको गौतम बुद्ध अन्तर्राष्ट्रिय क्रिकेट रंगशालामा सहयोग गरिने बताइएको छ ।

यस्तै आजैबाट प्रदर्शनमा आएको फिल्म ‘आमा’ मा मिथिला शर्मा र सुरक्षा पन्तको शीर्ष भूमिका छ । फिल्मको निर्देशन दीपेन्द्र के खनालले गरेका हुन् भने कथा र छायांकन पनि उनकै छ ।

आमाको सम्बन्ध र ममता देखाइएको यो फिल्मले मानवीय संवेदनालाई छुने प्रयास गरेको छ । फरक खालका फिल्म मन पराउने दर्शकले यो फिल्म रुचाउने अपेक्षा गरिएको छ ।