काठमाडौं – फिल्म ‘लभ डायरिज’ को ट्रेलर सार्वजनिक गरिएको छ । सोमबार राजधानीमा एक कार्यक्रमको आयोजना गर्दै फिल्मको ट्रेलर सार्वजनिक गरियो ।

युट्युबमा भने राति मात्र ट्रेलर सार्वजनिक गरिएको थियो ।

प्रेम दिवसको अवसर पारेर फागुन २ गतेदेखि प्रदर्शनमा आउने ‘लभ डायरिज’ लाई सौरभ चौधरीले निर्देशन गरेका हुन् । फिल्ममा सुशील श्रेष्ठ र रुविना थापाको शीर्ष भूमिका रहेको छ ।

यसअघि फिल्मको गीत र टिजर सार्वजनिक भइसकेका छन् । पटक–पटक रिलिज मिति सार्दै आएको यो फिल्म फागुनमा आउने अब भने पक्काजस्तै भएको छ ।

प्रेमकथामा आधारित यो फिल्ममा प्रेम, विछोड र रोमान्सलाई देखाइएको छ । फिल्ममा विश्वजीत रिमाल, विष्णु सापकोटा, अर्जुनजंग शाही, विशाल पहारी लगायतका कलाकारले समेत अभिनय गरेका छन् । फिल्मका लगानीकर्ता विनोद सापकोटा हुन् ।

यस्तै फिल्ममा सञ्जय लामाको छायांकन, मिलन श्रेष्ठ र दीर्घ खड्काको सम्पादन तथा अर्जुन पोखरेलको संगीत रहेको छ ।