काठमाडौँ- भारतमा बनेको कोरोना भाइरसविरुद्धको खोप,’कोभ्याक’को आज अन्तिम चरणको परीक्षण हुँदैछ।

अन्तिम चरणको परीक्षणको सुरूवात हरियाणाका स्वास्थ्यमन्त्री अनिल विजले पहिलो डोज लगाउँदै प्रारम्भ गरिँदैछ ।

भारतीय जनता पार्टीका नेतासमेत रहेका ६७ वर्षीय विजले शुक्रबार अम्बालास्थित सिभिल अस्पतालमा ११ बजे परीक्षण खोप लगाउन लागेको ट्वीटरमार्फत जानकारी दिएका छन् ।

भारतको बायोटेक कम्पनीले इन्डियन काउन्सिल अफ मेडिकल रिसर्च (आईसीएमआर)को सहयोगमा कोरोनाविरुद्ध कोभ्याक्सिन बनाइरहेको छ ।

अघिल्लो साता खोपको पहिलो र दोस्रो चरण परीक्षण सफल भएको जनाएको बायोटेकले तेस्रो चरणको परीक्षणमा २६ हजार सहभागी हुने जनाएको छ ।

अन्तिम परीक्षण सफल भएमा सन् २०२१ को मार्चसम्म कोभ्याक बजारमा बजारमा आउने जनाइएको छ ।