काठमाडौं- मानव अधिकार तथा शान्ति समाजले पीसीआर परीक्षण तथा कोरोना संक्रमितको उपचार नगर्ने निर्णय तत्काल सच्याउन सरकारलाई आग्रह गरेको छ ।

समाजल आज विज्ञप्ति जारी गर्दै कोरोना संक्रमण विस्तार हुन नदिन आवश्यक प्रबन्धसहित कोरोना संक्रमितको उपचारबारेको निर्णय तत्काल सच्याउन आग्रह गरेको हो ।

पीसीआर परिक्षण तथा कोरोना संक्रमितको उपचारको प्रबन्ध नागरिक आफैले गर्नुपर्ने सरकारको निर्णय गैरजिम्मेवार एवं संवेदनहीनताको पराकाष्ठा भएको समाजले जनाएको छ ।

कोभिड–१९ संक्रमण नेपालमा भयावह हुँदै गइरहेको स्थितिमा पीसीआर परिक्षण निःशुल्क तवरमा व्यापक विस्तार गर्नुपर्ने, संक्रमणको चाप अनुसार समुचित उपचारको व्यवस्था गर्नुपर्ने समेत समाजले माग गरेको छ ।

महासचिव सुशिल बस्नेतद्वारा जारी विज्ञप्तिमा भनिएको छ, ‘नागरिकहरुको स्वास्थ्य उपचारप्रति उदासिन भएर कर्तव्यच्युत हुँदै जाँदा सरकार के को लागि भन्ने प्रश्न उब्जिएको छ ।’

कोरोना संक्रमितको मृत्यदरसमेत बढ्दै गएको यस गम्भीर परिस्थितीमा उपचारका लागि अत्यावश्यक आईसीयु, भेन्टिलेटरसहितका अस्पतालहरुको संख्या बृद्धि गर्नुपर्ने सरकारको प्रमुख दायित्व भएको विज्ञप्तिमा जनाइएको छ ।