काठमाडौं- काठमाडौं महानगरपालिकाले विदेशबाट फर्किएर महानगरपालिका क्षेत्रभित्र वसोवास गर्दै आएकाहरुको र्‍यापिड डाइनोस्टिक टेस्टलाई तीव्रता दिएको छ ।

महानगरले  हालसम्म ८०८ जनाको कोरोना परीक्षण गरेकोमा सबैको रिपोर्ट नेगेटिभ आएको जानकारी दिएको छ । महानगरका ३२ वडामध्ये २५ वटा वडाका ८ सय ८ जनाको र्‍यापिड टेस्ट गरेको जानकारी दिएको छ ।

काठमाडौं महानगरपालिका सहरी स्वास्थ्य महाशाखा प्रमुख नरेन्द्र बिलास बज्राचार्यका अनुसार आज मात्रै ६, ७, ८ र ९ का १ सय ६८ जनाको टेष्ट गरिएको हो । ती सबैको रिपोर्ट नेगेटिभ नै आएको छ ।

अब १,२ ३, ११, २८, २९ र ३० वडाको र्‍यापिड टेस्ट गर्न बाँकी रहेको महानगरले जनाएको छ । र्‍यापिड टेस्ट शुरु गरेको दोस्रो दिन वडा–४ मा ५१ र तेस्रो दिन अर्थात बैशाख ५ गते ९, १०, १५, ३१ र ३२ वडाका ३ सय ८६ जनाको टेष्ट गरेको काठमाडौं महानगरपालिकाका प्रमुख बिद्यासुन्दर शाक्यले जानकारी दिए ।

चौथौ दिन भित्री शहरमा १८, १९, २०, २१, २२, २३, २४, २५, २६ र २७ गरी १० वटा वडाका ७८ जनाको टेष्ट गरिएको थियो । उनीहरु पनि सबैको रिपोर्ट नेगेटिभ नै आएको थियो । आइतबार वडा–१२, १३, १४, १५, १६, १७ र २६ गरी १ सय ७६ जनाको टेष्ट गरिएको थियो । उनीहरुको पनि सबैको रिपोर्ट नेगेटिभ नै आएको थियो ।

काठमाडौं महानगरपालिकाका प्रमुख शाक्यले २०७६ फागुन १८ पछि विदेशबाट फर्किएर महानगर क्षेत्रमा बसोबास गरिरहेका, कोरोना लक्षणको शंका लागेकालगायतका व्यक्तिहरु कोरोना परीक्षण गरिएको जानकारी दिए ।

उनले विदेशबाट फर्किएकाहरुको तथ्यांक संकलनको कामलाई पनि तिव्रता दिइरहेको जानकारी दिए । काठमाडौं महानगरपालिकाका प्रशासन विभाग प्रमुख नमराज ढकालले २०७६ फागुन १८ पछि विदेशबाट फर्किएर महानगर क्षेत्रमा बसोबास गरिरहेका ३ सय २१ जनाको विवरण संकलन गरेको जानकारी दिए ।