काठमाडौं– प्रमुख प्रतिपक्षी दल नेपाली कांग्रेसका सभापति शेरबहादुर देउवाले संयम र सद्भावका साथ परिस्थितिको सामना गर्न अपिल गरेका छन् ।

सभापति देउवाले सोमबार एक प्रेस विज्ञप्ति जारी गर्दै सबै वर्ग जातजाति मिलेर कोरोनाको सामना गर्न अपिल गरेका छन् ।

देउवाले जारी गरेको विज्ञप्ति भनिएको छ, ‘कुनै पनि व्यक्तिको निश्चित आस्था र समुदायको भावनामा असर पर्ने ढंगले सरकार या कसैले पनि कुनै पनि कार्य गर्न नहुनेमा सचेतताका लागि म अपील गर्दछु । आजको चुनौतीपूर्ण घडीमा अनेक समुदाय, विभिन्न धर्मावलम्बी, सबै जाति, वर्ग र क्षेत्रलाई संयम र आपसी एकताका लागि म हार्दिक अपिल गर्दछु ।’

सभापति देउवाले कोरोना भाइरसको परीक्षणको दायरा समुदाय स्तरमा तीब्र रुपले विस्तार गर्नुपर्ने आवश्यकता रहेको समेत बताएका छन् ।

देउवाले पर्याप्त स्वास्थ सामग्री एवं पर्याप्त राहतको बन्दोबस्त गरेर सरकारले परिस्थितिलाई थप असहज बन्नबाट रोक्न माग गरेका छन् ।