काठमाडौं – युरोपका केही देशहरुले कोरोनाभाइरस (कोभिड–१९) रोकथामका लागि जारी लकडाउन खुकुलो पार्न सुरु गरेका छन् ।

संक्रमितहरुको संख्या धेरै रहेको मध्येको मुलुक जर्मनीले सोमबारबाट साना पसल खोल्न अनुमति दिएको छ । त्यस्तै उसले परीक्षा नजिकिँदै गरेका विद्यालय र कलेज सुचारु गर्ने भएको छ ।

पोल्यान्डले पनि सोमबारबाटै सबै पार्क र जंगल खुला गरेको छ । चेक गणतन्त्रमा व्यापारका लागि हवाई मार्ग सुचारु गरिएको छ। त्यस्तै नर्वेले साना बालबालिकाका लागि विद्यालय खुला गरेको छ ।

अर्को युरोपेली राष्ट्र अल्बानियाले खानी र तेल उद्योग सञ्चालन गर्ने तयारी गरेको छ । डेनमार्कले पनि विद्यालय तथा हेयरड्रेसर ट्याटु सेन्टरहरु पनि खोलेको छ ।

तर धेरै प्रभावित मुलुक इटलीमा भने तत्कालै लकडाउन नखुल्ने भएको छ । अन्तर्राष्ट्रिय सञ्चारमाध्यमहरुका अनुसाइ इटलीमा अकै केही महिना लकडाउनको सम्भावना रहेको छ ।