काठमाडौं– प्रधानमन्त्री केपी शर्मा ओलीले सम्बोधनका क्रममा घोषणा गरेका काम कार्यान्वयन गर्न मुख्य सचिवको संयोजकत्वमा रहेको कार्यदललाई निर्देशन दिइएको छ ।

शुक्रबार बसेको कोभिड—१९ संक्रमण रोकथाम तथा नियन्त्रण उच्चस्तरिय समन्वय समितिले प्रधानमन्त्री ओलीले घोषणा गरेका काम कार्यान्वयन गर्न मुख्य सचिव लोकदर्शन रेग्मी संयोजक रहेको कार्यदललाई निर्देशन दिएको हो ।

अर्थ र सञ्चार तथ सूचनाप्रविधिमन्त्री डा. युवराज खतिवडाले प्रधानमन्त्रीले सम्बोधनमा घोषणा गरेका विषयका बारेमा बैठकमा स्पष्ट पारिएको भन्दै त्यसलाई प्रभावकारी कार्यान्वयन गरिने बताए ।

मन्त्री खतिवडाले १० गतेबाट लामो दूरीका यातायात सेवा बन्द हुने भनेपनि आपूर्तिसँग सम्बन्धित कुनै पनि सेवा अवरुद्ध नहुने बताए ।

अन्तर्राष्ट्रिय हवाई उडान बन्द गर्ने सरकरी निर्णयपछि विभिन्न देशका विमानस्थलमा अलपत्र रहेका नागरिकहरुलाई सम्बन्धित देशमा रहेका नेपाली दुतावास मार्फत १४ दिन क्वारेन्टाइनमा राख्ने विषयमा पनि बैठकमा छलफल भएको पनि उनले बताए ।