काठमाडौं– घुस लिएर नागरिकतामा नाम र जन्म मिति सच्याउने जिल्ला प्रशासन कार्यालय मोरङका खरिदार र लेखापढी व्यवसायीविरुद्ध ६ लाख रुपैयाँको भ्रष्टाचार मुद्दा दर्ता भएको छ ।

अख्तियार दुरुपयोग अनुसन्धान आयोगले जिल्ला प्रशासन कार्यालय मोरङका खरिदार टेकबहादुर श्रेष्ठ र मोरङको बेलबारी नगरपालिका वडा नम्बर २ को कार्यालय बाहिर लेखापढी व्यवसाय गर्ने तीर्थराज गिरीविरुद्ध भ्रष्टाचार मुद्दा दायर गरेको हो ।

अख्तियारका अनुसार लेखापढी व्यवसायी गिरीले भारतीय सेनामा कार्यरत एकजना सेवाग्राहीको भारतीय सेनामै रहेको कागजात अनुसार नेपाली नागरिकतामा नाम र जन्म मिति सच्याउन ६ लाख रुपैयाँ घुस लिएका थिए ।

गिरीले जिल्ला प्रशासन कार्यालय मोरङका खरिदार श्रेष्ठसँगको मिलेमतोमा पदमबहादुर लिम्बु भनिने बमबहादुर लिम्बुको नागरिकता प्रमाणपत्रमा जन्म मिति र नाम संशोधन गरेका थिए ।

उक्त कार्यका लागि गिरीले सेवाग्राही लिम्बुबाट ६ लाख रुपैयाँ घुस लिएर खरिदार श्रेष्ठलाई १ लाख रुपैयाँ दिएका थिए ।

अख्तियारले गरेको अनुसन्धानका क्रममा जिल्ला प्रशासन कार्यालयका खरिदार श्रेष्ठले १ लाख रुपैयाँ घुस लिएको प्रमाणित भइसकेको छ ।

अख्तियारले खरिदार श्रेष्ठविरुद्ध १ लाख रुपैयाँ बिगो कायम गर्दै बिगोअनुसार जरिवाना र ६ महिनासम्म कैद सजाय मागदाबी गरेको छ ।

यस्तै, लेखापढी व्यवसायी गिरीविरुद्ध ६ लाख रुपैयाँ बिगो कायम गर्दै बिगोअनुसार जरिवाना र २ वर्ष ६ महिनासम्म कैद सजाय मागदाबी गरेर विशेष अदालतमा मुद्दा दायर गरिएको अख्तियारका केन्द्रीय प्रवक्ता प्रदीपकुमार कोइरालाले जानकारी दिए ।