न्यूयोर्क– विश्व स्वास्थ्य संगठन डब्लूएचओले विश्वभर महामारी फैलिएको कोरोना भाइरसलाई ‘चिनियाँ भाइरस’ नभन्न अमेरिकी राष्ट्रपति डोनाल्ड ट्रम्पलाई आग्रह गरेको छ ।

कोरोना भाइरसलाई ‘चिनियाँ भाइरस’ भन्दा यसले रंगभेदी सन्देश जानेभन्दै यसो नगर्न डब्लूएचओले ट्रम्पलाई आग्रह गरेको हो ।

अमेरिकी राष्ट्रपति ट्रम्पले कोरोना भाइरसलाई यसअघि बेला बेला ‘चिनियाँ भाइरस’ भन्दै आएका थिए । कोरोना भाइरसको उत्पत्ति भएको मुलुक चीनले भने ट्रम्पको भाषाप्रति आपत्ती जनाएको थियो ।

‘भाइरसले कुनै सीमा, जात, छालाको रंग वा तपाईंसँग बैंकमा कति पैसा छ भन्ने मतलब गर्दैन । त्यसैले हामीले भाषा र शब्द छनौट गर्दा ध्यान पुर्‍याउनुपर्छ ।’ विश्व स्वास्थ्य संगठन डब्लूएचओका आकस्मिक कार्यक्रमका निर्देशक डा. माइक रायनले भने ।

उनका अनुसार ट्रम्पको शब्द छनौटले एसियाली मूलका मािनसहरुविरुद्ध हिंसा भड्काउने खतरा छ ।

तर ट्रम्पले भने कोरोना भाइरसलाई चिनियाँ भाइरसको संज्ञा दिनु रंगभेदी टिप्पणी नभएको दाबी गर्दै आएका छन् । उनका अनुसार चीनबाट उत्पत्ति भएका कारण यो भाइसरलाई चिनियाँ भाइरस भनिएको हो ।

तीन महिनाअघि चीनको वुहान शहरबाट शुरु भएको कोरोना भाइरसका कारण विश्वभर हालसम्म १० हजार भन्दा धेरैको ज्यान गइसकेको छ भने २ लाख ४४ हजार यसबाट संक्रमित छन् ।