काठमाडौं– भारतीय क्रिकेट टोलीका कप्तान विराट कोहली र बलिउड नायिका अनुस्का शर्माले नोबेल कोरोना भाइरस (कोभिड १९) बाट जोगिन घरमै बस्न आव्हान गरेका छन् ।

कोहलीले बलिउड नायिका तथा आफ्नी पत्नी अनुस्का शर्माको ट्वीटर ह्यान्डलमा भिडियो अपलोड गर्दै कोरोनाबाट जोगिन सचेतना अपनाउन भनेका छन् ।

विराटले सरकारको निर्णयलाई समर्थन गर्दै स्वस्थ रहनका लागि घरमा बस्न आग्रह गरेका हुन् । ‘हामी सबैलाई थाहा छ । यो समय निकै कठिन परिस्थितिबाट ग्रुजिरेहको छ,’ विराटले भनेका छन्, ‘हामी सबै सरकारको निणर्यको सम्मान गर्दै घरमा बसौं, सुरक्षित बसौं र स्वस्थ रहौं ।’

यस्तै, अनुस्काले कोरोनासँग लड्न सबै एकजुट रहनु पर्ने बताएकी छन् । ‘हामी सबै मिलेर यसको सामना गर्नुपर्छ । त्यसो गरे यसलाई नियन्त्रण गर्न सम्भव छ,’ अनुस्काले भनेकी छन् ।

भारतमा अहिले कोरोनाका कारण ज्यान गुमाउनेको संख्या ६ पुगेको छ भने २०१ जनामा संक्रमण देखिएको छ ।

कोरोनाविरुद्ध लड्न भनै भारती प्रधानमन्त्री नरेन्द्र मोदीले बिहीबार देशभरमा ‘जनता कर्फ्यू’ घोषणा गरेका छन् ।