काठमाडौं– प्रमुख प्रतिपक्षी दल नेपाली कांग्रेसले ७० करोड कमिसन प्रकरणलाई लिएर भ्रातृ संगठन नेपाल विद्यार्थी संघले गरेको विरोध प्रदर्शनमा प्रहरीले गरेको हस्तक्षेप निन्दाजनक भएको जनाएको छ ।

कांग्रेसले आज साझ विज्ञप्ति जारी गर्दै शान्तिपूर्ण रुपमा विरोध प्रदर्शन गर्न पाउने नागरिकको संवैधानिक अधिकारमाथि राज्यले ठाडो हस्तक्षेप गरेको जनाएको छ ।

विज्ञप्तिमा लेखिएको छ– ‘घटनाको नेपाली कांग्रेस घोर निन्दा र भर्त्सना गर्दछ ।’

आज त्रिभुवन विमानस्थलको मूलद्वारमा नेविसंघका युवाहरुले कालो झण्डा देखाउँदै विरोध प्रदर्शन गरेका थिए । प्रदर्शनलाई नियन्त्रणमा लिन प्रहरीले हस्तक्षेप गरेको कांग्रेसको आरोप छ ।

प्रहरीको हस्तक्षेपबाट रविन्द्र रोकाय, राकेश शिवाकोटी, विपिन बुढाथोकी, विष्णुहरि खड्का, अनिल खनाल, गोपी भण्डारी, विवेक उप्रेती लगायतका विद्यार्थीहरु घाइते भएको कांग्रेसले विज्ञप्तिमार्फत जनाएको छ ।

विष्णुहरि खड्कालाई सुरक्षाकर्मीले गिरफ्तार गरेको समेत कांग्रेसले जनाएको छ । घाइतेहरुको उपचारको व्यवस्था र गिरफ्तार विद्यार्थीलाई तुरुन्त रिहाई गर्न कांग्रेस माग गरेको छ ।