काठमाडौं – युरोपियन फुटबलमा २ वर्षको प्रतिबन्धमा रहेको म्यान्चेस्टर सिटीले इङ्ग्लीस प्रिमियर लिगमा जीत हात पारेको छ ।

सिटीले बुधबार राति वेष्टहाम युनाइटेडलाई २–० गोल अन्तरले पराजित गर्दै प्रतिबन्धपछिको पहिलो जीत हात पारेको हो ।

सिटीको घरेलु मैदानमा उसका लागि रोड्रि र केभिन डि बार्यनले गोल गरेका हुन् । वेष्टहामविरुद्ध रोड्रिले खेलको ३० औं मिनेटमा गोल गर्दै टीमलाई अग्रता दिलाएका थिए ।

खेलको पहिलो हाफमा सिटी १–० गोलले अगाडि थियो भने दोस्रो हाफमा डि बार्यनले ६२ औं मिनेटमा गोल गर्दै टिमलाई २–० गोलको अग्रता दिलाए ।

वेष्टहामले गोल फर्काउन नसकेपछि बार्यनको उक्त गोल नै सिटीको जीतका लागि निर्णायक बनेको थियो ।

अघिल्लो सातामात्रै युरोपियन प्रतिबन्ध लागेको सिटीले प्रतिबन्ध छुटका लागि ‘कोर्ट अफ एव्रिभिएसन’ मा अपील गर्ने जनाएको छ ।