काठमाडौं– शहीद स्मारक ए डिभिजन लिगमा विभागीय टोली नेपाली सेनाको त्रिभुवन आर्मी क्लबले ५ औं जीत हात पारेको छ। च्यासल युवा क्लबविरुद्ध जीत हात पारेको आर्मी लिगको शीर्ष स्थानमा उक्लिएको छ।

आर्मीका लागि स्टार स्टाइकर भरत खवास, नवयुग श्रेष्ठ र सन्तोष तामाङले गोल गरे । च्यासल र आर्मीबीचको खेल पहिलो हाफमा गोलरहित बराबरी भएको थियो। तर, दोस्रो हाफमा आर्मीका लागि कप्तान खवासले गोल गर्दै च्यासलबिरुद्व १-० गोलको अग्रता बनाएका थिए।

योसँगै खवासको ए डिभिजन लिगमा ४७ औं  गोल भएको छ। खवासले खेलको ५८ औं मिनेटमा गोल गरेका थिए ।

दोस्रो हाफमा रक्षात्मक बनेको च्यासलबिरुद्व आर्मीका नवयुग श्रेष्ठले ७३ औं मिनेटमा गोल गर्दै टीमलाई २-० गोलको अग्रता दिलाएका थिए।
खेलको ८४ औं मिनेटमा च्यासलका रक्षक छिरिङ गुरुङले आर्मीका सुमन अर्याललाई पेनाल्टी क्षेत्रमा लडाएपछि आर्मीले पेनाल्टी पाएको थियो।

पेनाल्टी प्रहार गर्न आएका सन्तोष तामाङले ८४ औं मिनेटमा आर्मीका लागि तेस्रो गोल गरेका थिए । अतिरिक्त समयमा आर्मीले पेनाल्टी पाएपनि नवयुग गोल गर्न चुकेका थिए ।

जीतसँगै आर्मी ७ खेलबाट १६ अंकसहित शीर्ष स्थानमा छ भने पराजित च्यासल ६ अंकसहित पुछारबाट तेस्रो स्थानमा छ ।

आर्मी लिगको शीर्ष स्थानमा रहँदा दोस्रो र तेस्रो स्थानमा समान १३ अंक भएका मछिन्द्र क्लब र मनाङ मर्स्याङ्दी क्लब छन् भने चौथोमा ११ अंक बनाएको थ्री स्टार क्लब रहेको छ ।