दमौली– जिल्ला अदालत तनहुँले जबर्जस्ती करणी मुद्दाका एक अभियुक्तविरुद्ध १२ वर्ष ६ महिना कैद फैसला सुनाएको छ । जिल्ला न्यायाधीश दुर्गाप्रसाद ढुङ्गेलको इजलासले पालुङटार नगरपालिका–५ का कृष्णकुमार विकविरुद्ध सो कैद फैसला सुनाएको हो ।

गत असार १४ गते तनहुँको भानु नगरपालिका–३ तुरतेरस्थित ५ वर्षीया बालिकालाई बलात्कार गरेको अभियोगमा विकलाई प्रहरीले पक्राउ गरेको थियो । मुद्दाको सुनुवाई पछि विकविरुद्ध १२ वर्ष ६ महिना कैदसँगै पीडितलाई १ लाख क्षतिपूर्ति दिलाउने फैसला भएको जिल्ला अदालतका श्रेस्तेदार सुदर्शन खनालले जानकारी दिए ।

पीडितलाई क्षतिपूर्तिबापतको जरिवाना अभियुक्तबाट नै भराउने अदालतको फैसला छ । अभियुक्तविरुद्ध गत साउन ६ गते जिल्ला अदालतमा मुद्दा दर्ता भएको थियो ।