दोहा- कोभिड–१९ का कारण विगत ८ महिनादेखि कुवेतस्थित अल राकिब बिल्डिङ जनरल कन्ट्र्याक्टिङ कम्पनीमा अलपत्र परेका २७ नेपालीहरुको उद्धार गरिएको छ ।

कुवेतस्थित नेपाली दूतावासले टिकटको व्यवस्था  र स्वदेश फिर्तिको कानूनी पहलकदमी गरेर उनीहरुको उद्धार गरिएको गैर आवासीय नेपाली संघ आइसीसी कुवेतका सदस्य अमित चाम्लिङ राईले जानकारी दिए ।

दूतावास र सरोकारवालाहरुसँगको निरन्तर फलोअप र ४ महिनापछिको अथक प्रयासपछि उनीहरु फ्लाई दुबईको उडानमार्फत स्वदेश फर्किएको राईले बताए ।

कोरोनाको कारण देखाउदै कम्पनीले पारिश्रमिक नदिएपछि पीडित बनेका उनीहरुले कुवेतस्थित लेबरकोर्टमा उजुरी गरेका थिए ।

सोही उजुरी अनुसार कोर्टले कम्पनीका मालिक, नेपाली दूतावासका प्रतिनिधि र पीडित श्रमिकहरुलाई बोलाएर छलफल गरेका थियो ।

काठमाडौँस्थित एस आरके म्यानपावरबाट बाट जनही १ लाख ५० हजार बढी रकम तिरेर आफूहरु कुबेत पुगेको उनीहरुले बताएका छन् ।

कामबिहीन बनेर अलपत्र परेको उनीहरुलाई एनआरएनए कुवेत र विभिन्न संघ सस्थाले खाद्यान्न लगायतको राहत सामग्री उपलब्ध गराउँदै आएका थिए ।