पोखरा– गण्डकी प्रदेशमा शनिवार ६६ जना कोरोना भाइरस (कोभिड १९)संक्रमित थपिएका छन् ।

नयाँ संक्रमित थपिनेमा सबैभन्दा बढी पूर्वी नवलपरासी रहेको छ । पूर्वी नवलपरासीमा मात्रै शनिवार ४५ जना संक्रमित थपिएका छन् । पूर्वी नवलपरासीको देवचुली नगरपालिकाका ३४ जना, हुप्सेकोट गाउँपालिकाका ९ जना र बुलिङटार गाउँपालिकाका २ जना रहेका छन् । हुप्सेकोट गाउँपालिकाकी एक जना महिला स्वास्थ्य स्वयंसेविका रहेको स्वास्थ्य निर्देशनालय पोखराले जनाएको छ ।

यसैगरी, कास्कीको पोखरा महानगपालिकाका १३ जना नयाँ संक्रमित थपिएका छन् । पोखरा महानगरपालिका–४ का ४१ बर्षीय पुरुष पोखरा विश्वबिद्यालयमा कार्यरत चिकित्सक हुन् ।

यस्तै, पर्वतका २ जना संक्रमित मध्ये १ महिला र १ पुरुष छन् । एक जना पुरुष भने नेपाली सेनामा कार्यरत हुन् ।

निर्देशनालयकाअनुसार स्याङजा फेदीखोलाका १ पुरुष र वालिङका १ महिला तथा लमजुङको मध्यनेपाल ६ का १ पुरुषमा पनि शनिवार कोरोना संक्रमण पुष्टी भएको छ भने तनहुँका थप ३ जनामा संक्रमण देखिएको छ ।

होम आइसोलेशनका संक्रमितलाई सम्पर्क चिकित्सक

गण्डकी प्रदेशका होम आइसोलेशनमा बसेका कोरोना संक्रमितहरुका सम्पर्क चिकित्सकहरु तय गरिएका छन् । पोखराका ५ वटा वडाका लागि एक जना चिकित्सक तोकिएको छ ।

पोखरा महानगर १ देखि ४ नम्बर वडाका लागि प्रसूति रोग विशेषज्ञ डा. रुपेशसिंह बस्न्यात, वडा नम्बर ५ देखि १० सम्म डा. सरल लामिछाने, वडा नम्बर ११ देखि १५ सम्म डा. अष्ट श्रीकृष्ण पौडेल, वडा नम्बर १६ देखि २० सम्म डा. अविकान्त खतिवडालाई तोकिएको छ ।

यसैगरी, वडा नम्बर २१ देखि २५ सम्म डा. सुनिल अर्याल, २६ देखि २९ नम्बर वडाका लागि डा. सुशील रेग्मी र ३० देखि ३३ सम्म डा. निकास बाबु पोखरेललाई सम्पर्क चिकित्सक तोकिएको छ । होम आइसोलेशनमा बसेका संक्रमितहरुलाई कुनै समस्या भएका तोकिएका चिकित्सकहरुलाई सम्पर्क गर्न पनि स्वास्थ्य निर्देशनायले पोखराले आग्रह गरेको छ ।

लक्षणविहिन नयाँ संक्रमित होमआइसोलेशमा

कोरोना संक्रमितको संख्या बढ्दै गएपछि आइसोलेशनमा संक्रमित राख्ने ठाउँ अभाव भएपछि लक्षणविहिन नयाँ संक्रमितलाई घरमै रहन भनिएको छ ।

नयाँ संक्रमितहरुलाई कुनै पनि बेला समस्या हुन सक्ने भएकाले त्यसका लागि सम्बन्धित जिल्लाका स्वास्थ्य कार्यालयले चिकित्सकहरुको ब्यवस्थापन मिलाएको छ । नयाँ संक्रमित थपिएसँगै गण्डकी प्रदेशमा कोरोना संक्रमितको संख्या ३ हजार ४ सय २ पुगेको छ ।