काठमाडौं- क्यारेबियन प्रिमियर लिग (सीपीएल) क्रिकेट अन्तर्गतको पहिलो खेलमा नेपाली युवा स्पिनर सन्दीप लामिछानेले विकेट हात पारेका छन् ।

जमैका तलाहवाजबाट खेलिरहेका सन्दीपले आफ्नो चार ओभरको स्पेलको अन्तिम ओभरमा एक विकेट लिन सफल भएका हुन् ।

सेन्ट लुसिया जुक्ससँग भइरहेको खेलमा सन्दीपले अफगानी खेलाडी नजिबुल्लाह जाद्रानलाई आउट गरेका हुन् ।

२० बलमा २५ रन बनाएर खेलिरहेका जाद्रान ठूलो सट प्रहार गर्ने क्रममा रोभमन पावेलको हातबाट समातिएका थिए । सन्दीपले ४ ओभरमा २३ रन खर्चदैँ १ विकेट लिएका हुन् ।

टस हारेर ब्याटिङ थालेको जुक्सले ताजा अवस्थामा पहिलो इनिङको खेल सकिदाँ ७ विकेट गुमाएर १५८ रन बनाएको छ ।

उसका लागि रस्टन चेजले ५२ रनको योगदान दिएका छन् । त्यसैगरी जमैकाका मुजिब उर रहमान र ओसेन थोमसले २- २ विकेट लिएका छन् ।

जमैकाले १५९ रनको लक्ष्य पछ्याएर ब्याटिङ गर्दैछ।