काठमाडौं- सत्तारुढ नेपाल कम्युनिस्ट पार्टी नेकपाका अध्यक्ष पुष्पकमल दाहाल प्रचण्डले प्रधानमन्त्रीसमेत रहेका अध्यक्ष केपी शर्मा ओलीसँग भएको वार्ता र छलफलबारे खुमलटार बैठकमा ब्रिफिङ गरेका छन् ।

आज बिहानैदेखि प्रचण्ड निवास खुमलटारमा जारी बैठकमा प्रचण्डले ओलीले विभिन्न अफर ल्याएर सबैलाई झुक्याउन खोजेको भन्दै उधारो सहमति नमान्ने बताएका छन् ।

खुमलटारमा उपस्थित नेताहरु झलनाथ खनाल, माधवकुमार नेपाल, नारायणकाजी श्रेष्ठसँगको छलफलमा प्रचण्डले विभिन्न चरणमा ओलीसँग गरिएका वार्ताबारे जानकारी गराउँदै आफूहरुबीच साझा धारणा बनाएर अघि बढ्ने बताएको स्रोतले जनाएको छ ।

खुमलटार स्रोतले भन्यो, ‘प्रचण्डले नेताहरुसँग केपी ओलीसँग भएको छलफलको ब्रिफिङ गर्नुभएको छ । ब्रिफिङका क्रममा प्रचण्डले साझा धारणा बनाई अघि बढ्ने बताउनुभएको छ । ओलीको महाधिवेशनको प्रस्ताव सकारात्मक र राम्रो उद्देश्यले नआएको उहाँको भनाइ छ ।’

ओलीले सहमति नभएको विषयमा पनि सहमति भएको भन्ने प्रचार गरेको बताउँदै प्रचण्डले ‘आफ्नो सहमति रहेपनि सहमतिको प्रचार गरी आन्तरिक विभाजन ल्याउन खोजिएको’ आरोप लगाएको ती नेताले बताए ।

ओलीले सबैलाई अफर दिएर झुक्याइरहेकाले अब उधारो सहमति मान्न नसकिने प्रचण्डले बताएका थिए । उनले पार्टीभित्रको समस्या समाधानमा आफू लचक हुने र सबै पक्षलाई समेटेर लैजाने बताएका थिए ।