काठमाडौं- पर्सनल प्रोटेक्टिभ इक्प्युमेन्ट (पीपीई) भन्ने वित्तिकै जो सुकैले अनुमान गर्छन्, स्वास्थ्यकर्मीले कोरोनाको परीक्षण गर्न नमूना संकलन गर्दा, स्वास्थ्य जाँच तथा उपचारका लागि कोरोना संक्रमितको नजिक जानु पर्ने अवस्थामा प्रयोग गर्छन् । तर हामीले अनुमान गरेको भन्दा फरक खालको एउटा दृष्य सामाजिक सञ्जालमा अहिले भाइरल भइरहेको छ ।

जहाँ केही महिलाहरु गीत गाइरहेका छन् । भिडियो हेर्दा विहेको रत्यौली जस्तो देखिन्छ । जहाँ महिला पुरुषहरुको भीड छ । त्यहि भिडको बीचमा एकजना व्यक्ति गीतमा छमछम नाच्दै छन् । विवाहमा गीत गाउँनु, नाच्नु नौलो दृष्य होइन । तर, त्यो नाचले सबैको ध्यान तानेको छ ।

किनकी नाँच्ने व्यक्तिले कोरोना परीक्षणका लागि स्वाब संकलन गर्दा, संक्रमितको स्वास्थ्य परीक्षण गर्दा संक्रमणबाट बच्न स्वास्थ्यकर्मीले प्रयोग गर्ने गरेको पीपीई लगाएका छन् ।

विभिन्न ठाउँका अस्पतालहरुमा अहिले पनि स्वास्थ्यकर्मीको सुरक्षाका लागि पीपीई अभाव भएको कुरा आइरहेको छ । तर, त्यहा भने रत्यौलीमा एकव्यक्तिले पीपीई लगाएरै नाँचिरहेका छन् ।

सामाजिक सञ्जालमा भाइरल भएको त्यो भिडियो आफ्नो फेसबुकमा सेयर गर्दै एकजना कृष्ण मोक्तान व्यंग्यात्मक रुपमा लेखेका छन्, “सरकार यसरी हुदै छ है पीपीईको सदुपयोग ।”

मोक्तानले उक्त भिडियो सामाजिक सञ्जाल टिकटकमा भेटेर सेयर गरेका खबरहबलाई बताए । स्वास्थ्यकर्मीका लागि पीपीई अभाव भइरहेको समस्या रत्यौलीमा पीपीईको दुरुपयोग हुनु गलत भएको उनले बताए ।