काठमाडौं – प्रधानमन्त्री केपी शर्मा ओलीले मिलेनियम च्यालेन्ज कर्पोरेसन (एमसीसी) के गर्ने भन्ने विषय संसदमै छलफल हुनुपर्ने बताएका छन् । अघिल्लो सरकारले गरेको सम्झौताको वर्तमान सरकारले निरन्तरता दिएको बताउँदै प्रधानमन्त्री ओलीले एमसीसी सदनमा पेस भएकाले सदनबाटै छलफल गरी निर्णयमा पुग्नुपर्ने बताए ।

सम्बोधनका क्रममा प्रधानमन्त्रीले भने, ‘पछाडिका ढोकाबाट एमसीसी छिराउन खोजियो भनेर पनि प्रश्न उठ्यो । तर लप्सीफेदी–रातमाटेको विद्युत प्रशारण लाइनको महत्व नेपालीले नै पहिचान गरेको विषय हो । नेपाल जलविद्युतको धनी देश हो । पछाडिको ढोकाबाट हैन, अगाडिको ढोकाबाट बन्छ । एमसीसीले बनाए पनि बन्छ । अरुले बनाएपनि बन्छ नत्र हामी आफै बनाउँछौं ।’

प्रधानमन्त्रीले भने,’ हामीसँग यति धेरै विजुली उत्पादन भइरहेको छ । तर त्यसको प्रशारण लाइन छैन अनि प्रशारण लाइन नबनाएर हुन्छ ? एमसीसी अघिल्लो सरकारकै बेलामा सम्झौता भएका कारणले अहिलेको सरकारले संसदमा टेवल मात्रै गरेको हो । अघिल्लो सरकारले गरेको काम मैले गरेको होइन भनेर छाड्न मिल्दैन । त्यसको पालना गरेन भने स्थायीत्व, नीतिहरुको बारेमा गम्भिर समस्या आउँछ । दुई देशका बिचमा भएका सम्झौता कार्यान्वयन भएन भने त्यसले कुटनीतिक समस्या सिर्जना हुन्छ ।’

उनले भने, ‘यो विषयमा पार्टीहरुका बीचमा छलफल हुनसक्छ । सांसदहरुका बीचमा पनि छलफल हुनसक्छ । तर सरकारले गरेका सम्झौता कार्यान्वयन नगर्न हुँदैन । एमसीसी कहाँ लेखेको छ र ? नीति तथा कार्यक्रममा ? एमसीसी पास भए पनि नभएपनि विद्युत प्रशारण लाइन भोलिका लागि निर्माण गर्छ ।’