काठमाडौं- नेपाल चेम्बर अफ कमर्सले कोरोना भाइरस ( कोभिड(१९)बाट अर्थतन्त्रमा परेको प्रभावका सम्बन्धमा अर्थमन्त्री समक्ष २४ बुँदे सुझाव प्रस्तुत गरेको छ ।

चेम्वर अफ कमर्सका अध्यक्ष राजेशकाजी श्रेष्ठले अर्थ तथा संचार मन्त्री डा.युवराज खतिवडा समक्ष कोरोनाले अर्थतन्त्र पारेको प्रभावबारे सुझाव पेश गरेका हुन् ।

उक्त अवसरमा मन्त्री खतिवडाले निजी क्षेत्रले उपभोग्य वस्तु, औषधी तथा उपकरण सहज तथा सुलभ तवरमा उपलब्ध गरी आपूर्ति व्यवस्थालाइ चुस्त बनाइ जिम्मेवारपूर्ण ढंगले भूमिका निर्वाह गरेकोमा चेम्बरलाई धन्यबाद दिँदै यसलाइ निरन्तरता दिन आग्रह गरे ।

उनले बैंक तथा वित्तीय संस्थाहरु अहिलेको परिस्थितिमा नाफामूखी हुने होइन । नगद प्रवाहलाइ सजिलो बनाउने, कर्जा लिने ग्राहकलाइ साँवा व्याज तिर्ने म्याद वढाउने तर्फ आवश्यक व्यवस्था गरिने बताए ।

यसबाट चुनौती मात्र नभइ अवसर पनि प्राप्त भएको बताए । बाहिरबाट आएका श्रमिकहरुबाट आन्तरिक आर्थिक गतिविधिमा सम्मिलित हुने भएकोले कृषि क्षेत्र गतिशील हुने र अर्को तर्फ इ बिजनेश, अनलाइन बिजनेशको प्रचुर प्रयोगले इलोक्ट्रोनिक कारोबार प्रयोग हुने गरेको समेत उनले जानकारी दिए ।

सरकारबाट प्रदान गरिएको राहत प्याकेज बिपन्न वर्गको लागि भएकोले तदनरुप उपयोग गरि दिन समेत अर्थमन्त्री खतिवडाले आग्रह गरे ।

अर्थतन्त्रमा कोरोना भाइरसबाट अर्थतन्त्रमा पुगेको क्षति अध्ययनका लागि गठित उच्चस्तरीय कार्यदलमा निजी क्षेत्रलाइ पनि समावेश गरी उनीहरुको राय सुझावको आधारमा भावी कार्यक्रम तय गरिने बताए ।