काठमाडौं– स्वास्थ्य तथा जनसंख्या मन्त्रालयले शुक्रराज ट्रपिकल तथा सरुवा रोग अस्पालका प्रमुख मेडिकल अधिकृत डा शेरबहादुर पुनको सम्बन्धमा कपोकल्पित समाचारहरु सम्प्रेषण भएको आरोप लगाएको छ ।

डा. पुनमाथि ‘कारबाही गरी मन्त्रालय’मा तानिएको भन्दै विभिन्न सञ्चारमाध्यममा समाचार प्रकाशन÷प्रसारण भएपछि मन्त्रालयले आइतबार आफ्नो धारणा सार्वजनिक गरेको हो ।

आइतबार नियमित पत्रकार सम्मेलनमा बोल्दै मन्त्रालयका सहसचिव रघुराम विष्टले डाक्टर पुनलाई स्पष्टीकरण गरेको भनेर कपोकल्पित समाचार सम्प्रेषण गरिएको बताए ।

सहसचिव विष्टले डा पुनलाई काममा बाधा नपुग्ने गरी कोरोनाविरुद्धको सरकारको अभियानमा सघाउन आग्रह गर्दै मन्त्रालयमा बोलाएको पनि बताए ।

सञ्चारमाध्यममा आएजस्तो डाक्टर पुनलाई कारबाही गर्ने तयारी नभएको उनको भनाइ थियो । उनले डा पुन मन्त्रालयको पत्रपछि आजै मन्त्रालयमा उपस्थित भएको पनि बताए ।