काठमाडौं– नेपालस्थित जापानी राजदूतावासको पर्खाल नाघेर अनधिकृत रुपमा दूतावास परिसरमा प्रवेश गरेका एक विदेशी नागरिकलाई प्रहरीले पक्राउ गरेको छ ।

आफूलाई चिनियाँ नागरिक बताउने ती विदेशी नागरिक काठमाडौंको पानीपोखरीमा रहेको जापानी राजदूतावासको पर्खाल नाघेर दूतावास परिसरमा पुगेका थिए । झण्डै ५ मिटर अग्लो पर्खाल नाघेर दूतावासको परिसरमा पुगेका उनलाई अनाधिकृत रुपमा प्रवेश गरेको देखेपछि दूतावासका सुरक्षाकर्मीले नेपाल प्रहरीलाई खबर गरेका थिए । प्रहरीले दूतावाससँगको समन्वयमा उनलाई पक्राउ गरेको हो ।

महाराजगञ्ज वृत्तबाट प्रहरी निरीक्षक रवि थपलिया नेतृत्वमा खटिएको टोलीले उनलाई दूतावासबाटै पक्राउ गरी स्वास्थ्य परीक्षणका लागि त्रिभुवन विश्वविद्यालय शिक्षण अस्पतालमा लगेको छ । प्रहरीले उनको स्वास्थ्य चेकजाँचपछि थप छानबिन गर्ने बताएको छ । प्रहरीले एम्बुलेन्स बोलाएर उनलाई त्रिवि शिक्षण अस्पताल लगेको छ ।

अग्लो पर्खाल नाघेर दूतावास परिसरमा पुगेका उनको शरीरका बिभिन्न भागमा चोटपटक समेत लागेको छ ।

उनी किन दूतावास परिसरमा प्रवेश गरे भन्ने थप छानविनपछि थाहा हुने प्रहरीले जनाएको छ । उनी आफैले चिनियाँ नागरिक भएको बताए पनि उनी चिनियाँ हुन् वा होइनन् भन्ने स्पष्ट भइनसकेको प्रहरीले जनाएको छ ।

प्रहरीले हालसम्म उनको साथबाट परिचय खुल्न कागजात समेत फेला पार्न नसकिएको जानकारी दिएको छ ।