नवलपुर– नवलपरासी (पूर्व)को हुप्सेकोट गाउँपालिका–२ चपाहा धारापानीबाट विभिन्न हतियारसहित एकजना व्यक्ति पक्राउ परेका छन् ।

पक्राउ पर्नेमा धारापानी घर भएका ६३ वर्षीय तारा बहादुर विक छन् । जिल्ला प्रहरी कार्यालय नवलपरासी (पूर्व)का अनुसार उनको साथबाट भरुवा बन्दुकदेखि अत्याधुनिक हतियारका गोलीहरु बरामद गरिएको छ ।

विकको साथबाट मेड इन युएसए लेखिएको अटोमेटिक पेस्तोल १ थानसहित ५ राउण्ड गोली, १ थान एयर गन, एएएलआरको गोली २ राउण्ड, थ्रीनटथ्री राइफलको गोली १ राउण्ड, एम–१६ राइफलको गोली १ राउण्ड, सर्टटनको खोका २ थान, पुरानो कटुवा पेस्तोल तथा घोडाचाप, अन्य हतियारको गोली २ राउण्ड र विभिन्न हातहतियारका पाटपूर्जा बरामद भएका छन् ।

जिल्ला प्रहरी कार्यालय नवलपरासी (पूर्व)का प्रहरी नायव उपरीक्षक (डीएसपी) मोहन खाँडले बिहीबार अदालत बन्द भएका कारण शुक्रबार मात्रै उनलाई अदालतमा पेश गरी थप अनुसन्धानका लागि म्याद थपको अनुमति लिने जानकारी दिए ।